有時D人真係幾Creative，會諗到好多野去考我。
久唔久就會有啲人想搵我寫醫生信，幫佢哋證明唔同嘅嘢。正常簡單嘅就證明佢 physically fit 唔 fit 去學校 Exchange Program 膠一膠留下，入職檢查可唔可以返工，老友記可唔可以繼續揸車，小朋友而家冇手足口病/水豆可以繼續返學/繼續返興趣班，大朋友可唔可以去參加三項鐵人賽，去內蒙古跑馬拉松，耳膜穿窿但係想去學潛水等等……
特別啲嘅就試過填適唔合適合領養小朋友D表格。
當然有唔正常嘅例子：
1. 有大學生叫我寫信證明佢只係適合住宿舍嘅單人房。原因可以係因為同房有鼻鼾聲，同同房唔夾，從來冇同人哋同房過所以怕唔適合等等。乜大學生活唔係為咗要體驗多D野咩？個個都要單人房，邊鬼到有咁多單人房？
2. 試過有個學生過嚟想證明佢學校個Locker唔適合佢。原因就係因為佢俾人編咗喺低層Locker，佢只不過係唔想每次彎低身攞嘢。呢個學生係Physically完全一啲事都冇。背脊冇痛冇舊患冇脊柱側彎冇任何脊椎嘅問題等等，做乜得你咁尊貴，剩係得你唔可以彎低攞嘢，但係人哋可以？
原來原來呢啲學生長大咗之後就會變無賴文員。有幾個女人（唔知點解暫時問我嘅都係女人）試過入嚟問我寫不同嘅證明。
3. 有個話佢每次坐係Office入面都覺得唔舒服。想我寫話佢比較適合喺戶外做嘢。咁係咪我應該寫佢應該去做搭棚？做救生員？做花王？
大佬，我夠想係屋企/Starbucks/迪士尼城堡/巴黎鐵塔/柏林圍牆/東京築地⋯前睇病，Skype問症，操作個機械手幫你做檢查，跟住喺雲端出張藥單俾你自己去執藥得唔得？
4. 有個想我寫佢Office非常需要一張沙發！
我都覺得我間房需要一張Osim天王椅同King Size床。最好有兩個小白臉，拎住把扇，瞓喺上高餵我食Krispy Kreme original glazed donut。😍😍
大家係咪諗多左？
~~~
快閃三日兩夜星加坡之旅
去左參加左親戚嘅婚禮。中間當然爭取時間食食食食食食食食食
PS： 我係唔食榴槤嘅😭😭😭😭
Search